- ابنِي كان بينسي يشحَن موبايله قبل ما ينام ، أخدته حطِيته يشحَن..
صحي الصُبح مبسوط أوي وقعد يشكرني ، تاني يُوم : بردو نسِي ، شحنته له ، قالي : شكراً يا بابا ، تالت يوم : نُمت بدري وما شحنتش الموبايل بتاعه ، صحي مُتضايق وزعلان وبيعاتبني ليه ماحطتيش الموبايل على الشحن ينفع كده..؟
- رتّبت سرير بنتي كام يوم بدلها ، بطلت ترتبو هي خالِص ، حتي لو مش تعبانة أو مش مشغولة!
- عوَّدت صاحبي إني أتصِل بيه أتطمن عليه ، في يوم تعِبت و ما سألتش عليه ، زعِل وقالي ما إتصلتش بيا ليه؟
- إستحمَلت زميلي ساعة غضبه ، بقي العادي بتاعه إنه يتعصَّب عليا..
- صدِيق ورِث هو وإخواته عمارة بيقتسموا إيجارها ، ساب حقه لإخواته كام شهر ، ولمّا إتزنق شهر وحب ياخد إيجارها شهر واحد ،
بصولو باستغراب ، وكان لازم يحكِي تفاصيل زنقته علشان ياخُد حقه
و..و...و....و.....
حكايات كتير ، نفس النظام..
كل اللي يجي على نفسه ويفضِّل غيره عليه ويشيل عنه ، لازم يفضل كدا أو هيبقَي وِحش!
أوقات بنتنازَل عن حقُوقنا لحد ما الأخرين يفتكرُوها حَق مُكتسب!